АНКАРА (АА) – Во тек е масовна спасувачка операција за пронаоѓање на околу 100 исчезнати лица по лизгањето на земјиштето и ненадејните поплави предизвикани од ненадејна силна бура со дожд, јавува Анадолу.
Инцидентот се случи вчера во селото Дарали во северната индиска држава Утраханд.
Властите досега успеаја да спасат неколку луѓе.
Пушкар Сингх Дами, главниот министер на државата, изјави дека спасувачките операции се во тек.
„Работиме со целосна будност и ефикасност за брза и соодветна помош до погодените лица“, додаде тој.
Индиската Армија соопшти дека најмалку девет армиски припадници се водат како исчезнати, а дополнителни воени единици се распоредени на терен, вклучувајќи кучиња трагачи, дронови, логистички беспилотни летала и тешка механизација за побрзо расчистување и спасување.
„Во координацијата се вклучени и армијата и воздухопловните сили за доставување на неопходни намирници, лекови и евакуација на заглавените лица. Во меѓувреме, жителите се преместени на повисоки терени поради зголеменото ниво на водата од постојаните дождови“, соопшти Централната команда на Армијата на Индија на социјалната мрежа X.
Министерот за одбрана Санџај Сет ја оцени ситуацијата како сериозна, наведувајќи дека четири лица загинале, а околу 100 се водат како исчезнати, според неговата изјава за „Прес траст оф Индија“.
Телевизиските снимки го прикажуваат уништувањето што се случи во областа, со уништени бетонски куќи и патишта.
Индискиот премиер Нарендра Моди вчера изјави дека нема да остане ништо непребарано во обезбедувањето помош на луѓето.
Извор: Anadolu Agency (AA)
