Фудбалската федерација на Македонија (ФФМ) ѝ изрази поддршка на ФК Шкендија во пресрет на вечерашниот натпревар против Карабах, во рамки на квалификациите за Лигата на шампионите.
„Веруваме во тимот и се надеваме дека и понатаму ќе нè радува со настапите во европските купови“, се вели во соопштението на ФФМ, со кое се потенцира значењето на настапите на македонските клубови на меѓународната сцена.
Од федерацијата упатија и апел до сите навивачи натпреварот да го проследат со спортски дух и фер-плеј, без навреди и провокации по било каква основа.
„Само со достоинствено однесување и заедништво, чекор по чекор, да докажеме дека македонскиот фудбал може да напредува, на теренот и надвор од него“, истакнува ФФМ.
Фудбалот, како што посочуваат од федерацијата, треба да биде пред сè симбол на обединување, страст и почит.
„Да покажеме дека знаеме да навиваме со страст, но и со почит. Фудбалот на прво место!“ – се вели во пораката.
