Најмалку 55 мигранти загинаа при превртување на чамец кај брегот на Јемен

САНА/ИСТАНБУЛ (AA) – Најмалку 55 нерегуларни африкански мигранти загинаа вчера кога чамецот што ги превезувал се превртел во близина на брегот на јеменската покраина Абјан, соопштија официјални лица, јавува Анадолу.

Според безбедносен извор за Анадолу, чамецот, кој пренесувал десетици мигранти – најмногу од Етиопија – потонал на разденување поради лошите временски услови.

Абдел Кадер Баџамил, директор на Здравствената канцеларија во Зинџибар, главниот град на покраината, за Анадолу изјави дека се пронајдени телата на 54 Етиопјани и еден Јеменец. Властите сè уште бараат десетици исчезнати патници.

Баџамил рече дека сите жртви се погребани.

Претходно вчера полицијата во Абјан соопшти дека спасувачките екипи спроведуваат голема хуманитарна операција за пронаоѓање на телата, додавајќи дека мигрантите се обиделе да стигнат до Јемен преку шверцерски брод од Африканскиот Рог.

Според новинската агенција „Јемен виндоу“, телата на 25 етиопски мигранти биле извлечени од бреговите на градовите Шакра и Зинџибар.

Меѓународната организација за миграција (IOM) соопшти дека само во 2024 година, над 60.000 илегални мигранти пристигнале во Јемен.

Јемен претставува честа дестинација за стотици мигранти од Африканскиот Рог, особено од Сомалија и Етиопија, кои се одлучуваат на опасното патување со надеж дека ќе стигнат до земјите од Заливот за подобри животни услови.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.