Во тек е третата фаза од изградбата, односно изведба на инсталациите во новиот објект на Турскиот театар во Скопје, како и изведба на сценско театарските технологии со внатрешното уредување и опремување, вели министерот за култура и туризам Зоран Љутков.
За реализација на овие активности предвидени се 84.000.000 денари (1,359,223 евра), а дел од овие средства се обезбедени со ребаланс на буџетот за 2025.
Турскиот театар во Скопје постои 75 години, а веќе 10 години ги користи просториите на Театар Комедија. Објектот, кој се наоѓа во населбата Пролет близу железничката станица, почна да се гради пред 11 години.
Објектот е проект на Министерството за култура и институцијата Турски театар, кој се јавува како инвеститор. Автор на идејното решение е архитектот Виктор Михајлов, кој е автор и на објектот на Филхармонијата. Театарот има две сали, голема со 329 места и мала со 120 места. Функционално, објектот е на седум нивоа, од кои пет надземни и два подземни.
- НОВАТА ЗГРАДА НА ТУРСКИОТ ТЕАТАР ВО СКОПЈЕ ГО ЧЕКА ТЕНДЕРОТ ЗА ИНСТАЛАЦИИ
- ПО ДЕВЕТ ГОДИНИ ОД ПОЧЕТОКОТ НА ГРАДБАТА, ГОТОВИ СЕ ФАСАДАТА И КРОВОТ НА ТУРСКИОТ ТЕАТАР ВО СКОПЈЕ
Изградбата на карабината почна на 23 јуни 2014, а беше завршена и примопредадена на 15 јуни 2017. Театарот почна да се гради како еден од капиталните проекти на тогашната влада на ВМРО-ДПМНЕ со премиерот Никола Груевски и министерката за култура Елизабета Канческа-Милевска.
„Скопскиот Турски театар е единствениот театар на Балканот кој опстојува 75 години како национална установа поддржана од Министерството за култура, кој претставите ги игра на турски јазик надвор од границите на Турција. Откако почна да се гради новиот објект, Турски театар ги користи просториите и сцената на Театар Комедија. Претходно, Турскиот и Албанскиот театар со години заедно работеа во Театарот на народностите во скопската Стара чаршија.
Моментално ние ја делиме сцената со Театар Комедија и сме сместени таму веќе 10 години. Оваа состојба не е идеална, бидејќи и двата театри се меѓу најангажираните институции во земјата. Сепак, со меѓусебна почит, разбирање и силна волја, успеавме да ја одржиме нашата продукција на високо уметничко ниво. Нашиот репертоар останува богат, разновиден и современ, а публиката е секогаш во центарот на нашето внимание.
Особено сме горди што нашата нова театарска зграда конечно е во фаза на изградба. Ова претставува историски момент за нашата установа, бидејќи за првпат по многу години ќе добиеме сопствен простор – функционален, модерен и достоен за една национална институција. Веруваме дека во блиска иднина ќе можеме да ги отвориме вратите на новиот објект и да ја продолжиме нашата мисија со уште поголема енергија и инспирација“, вели за САКАМДАКАЖАМ.МК, директорот Осман Али.
Б. НЕСТОРОСКА
ИЗВОР: sdk.mk
