Словенија стана првата земја во Европа која воведе целосна забрана за увоз, извоз и транзит на воено оружје и опрема до и од Израел, вклучително и преку нејзината територија. Одлуката е донесена еднострано, во контекст на отсуство на заеднички европски одговор на израелската офанзива во Газа.
Премиерот Роберт Голоб во изминатиот период повеќепати најавуваше дека, доколку Европската унија не постигне консензус со конкретни чекори во однос на политиката на Израел, Словенија ќе дејствува самостојно.
Роберт Голоб, премиер на Словенија
„Одговорните држави мора да дејствуваат, дури и ако тоа значи да се исчекори пред другите“ вели Голоб.
Според словенечката влада, одлуката е резултат на кршење на меѓународното хуманитарно право.
Соопштение на Словенечка влада
„Луѓето во Газа умираат затоа што хуманитарната помош систематски им се одбива. Тие умираат под урнатините, без пристап до чиста вода, храна и основна медицинска нега. Станува збор за свесно кратење на основните услови за преживување. Во такви услови, одговорноста на секоја држава што се раководи според принципите на меѓународното право е да реагира – дури и доколку тоа значи преземање чекори пред останатите“, се наведува во официјалното соопштение на Владата на Словенија.
Покрај оваа забрана, словенечките власти најавија и дополнителни мерки против израелската влада, со цел, како што се наведува, да се изрази јасен став против сериозните и системски прекршувања на човековите права.
Само две недели претходно, Словенија прогласи двајца високи израелски функционери за персона нон грата, министерот за национална безбедност Итамар Бен-Гвир и министерот за финансии и одбрана Безалел Смотрих. Официјалната позиција на словенечката влада е дека нивните јавни настапи претставуваат отворено поттикнување на екстремно насилство и кршење на основните права на Палестинците, со реторика која, според оценките, носи елементи на геноцид.
Одлуката на Словенија се темели на претходното признавање на палестинската државност во 2024 година, но и повик до останатите земји да се приклучат во контекст на признавањето на нивната независност.
Извор: 24vesti.mk
