ИСТАНБУЛ (АА) – Меѓународната заедница има голема одговорност да воспостави итен прекин на огнот во Газа и да достави хуманитарна помош во регионот што е можно поскоро, изјави денес турскиот претседател Реџеп Таип Ердоган, јавува Анадолу.
Изјавите на Ердоган дојдоа за време на трилатералниот самит во Истанбул со италијанската премиерка Џорџа Мелони и премиерот на либиската Влада на национално единство, Абдул Хамид Дбејбе, соопшти Директоратот за комуникации на Турција на X.
Нагласувајќи ја агресијата на Израел и хуманитарната трагедија во Газа, Ердоган рече дека единственото трајно решение е воспоставување суверена, независна и географски интегрирана држава Палестина со Источен Ерусалим како главен град, врз основа на границите од 1967 година.
На самитот е дискутирано и за соработката меѓу земјите, како и за регионалните прашања, се наведува од Директоратот.
Турскиот претседател ја истакна важноста на соработката меѓу трите земји во справувањето со предизвиците со кои се соочува регионот на Медитеранот, вклучително и движењата на нерегуларната миграција.
Тој додаде дека се потребни долгорочни и одржливи решенија, како и мултилатерална координација, со цел да се искорени изворот на нерегуларната миграција.
За време на самитот одлучено е лидерите да се состанат за да ги разгледаат одлуките донесени по заседавањето на комисиите за соработка, се наведува понатаму.
Отфрлајќи ги меѓународните повици за прекин на огнот, израелската армија спроведува брутална офанзива врз Газа од 7 октомври 2023 година, во којашто убиени се над 60.000 Палестинци, повеќето од нив жени и деца. Немилосрдното бомбардирање ја уништи енклавата и доведе до недостиг на храна.
Извор: Anadolu Agency (AA)
