По пауза од осум години, Македонија повторно ќе има свој претставник во групна фаза на европско натпреварување под капата на УЕФА.
По историскиот настап на Вардар во сезоната 2017/18 во Лигата на Европа, сега тетовска Шкендија го следи тој пат и во најмала рака ќе настапи во групите на Конференциската лига.
Шкендија тоа го обезбеди со пласман во третото квалификациско коло за Лигата на шампионите, откако вечерва извојува нова победа над ФЦСБ, овојпат со 1-2 во Букурешт, и со вкупни 3-1 го елиминира романскиот гигант.
Следен предизвик за тетовчани ќе биде силниот Карабах, а шансите за уште поголем успех се тука. Доколку ја поминат оваа пречка,
Шкендија ќе се најде во плеј-офот за Лигата на шампионите. Но и евентуален неуспех во тој двомеч нема да значи крај. Македонскиот шампион ќе продолжи во плеј-офот за Лига Европа или како најлошо сценарио, ќе игра во групите на Конференциската лига.
Со овој пласман, Шкендија не само што обезбеди европска есен, туку и највисока премија во историјата на македонскиот клупски фудбал со најмалку 10 милиони евра од УЕФА. Сумата ќе продолжи да расте во зависност од понатамошниот успех и настапите во групната фаза.
Извор: kurir.mk
