Град Скопје ја отфрли изјавата на министерот за спорт, Борко Ристовски, дека Министерството немало надлежност во организацијата на Европската младинска олимпијада 2025. Од Градот тврдат дека токму ресорното министерство, заедно со Македонскиот олимписки комитет (МОК), ја водело целата организација, целосно исклучувајќи ја локалната самоуправа.
„Град Скопје ја даде својата поддршка за кандидатурата на Македонија и Скопје како домаќини на олимпијадата. Но, штом беше избрано домаќинството, организацијата премина во рацете на МОК и Министерството за спорт. Дел од натпреварите беа преместени во Куманово, што е спротивно на првичната идеја и на очекувањата на јавноста“, стои во реакцијата.
Градските власти велат дека биле целосно исклучени од сите активности, вклучително и од церемонијата на отворање, за која, според нив, не добиле ниту покана.
„По сите пропусти што се случија, сега вината се префрла на Градот. Одговорноста треба да ја понесат оние што ја имаа контролата врз организацијата од самиот почеток“, додаваат од Град Скопје.
ИЗВОР: racin.mk
