Љупчо Коцевски, државниот јавен обвинител, остро ја отфрли интерпелацијата што ја поднесоа шесттемина пратеници на Левица, оценувајќи дека зад документот нема фактичка основа, туку политички мотив. „Функцијата ја вршам чесно и одговорно, со почитување на транспарентност и отчетност“, рече тој, наведувајќи дека атакот врз Обвинителството уште еднаш ја поткопува довербата во правосудството.
Коцевски по точките на интерпелацијата:
– Трагедијата во Кочани: постапката се води исклучиво по докази, без оглед на партиска или етничка припадност. Обвинети се сопствениците на дискотеката, обезбедувањето, како и службени лица од неколку институции, вклучително и МВР. „Нема ‘чопоративно’ гонење – секој одговара за својот дел во трагедијата.“
– Обвинувања за влијание од премиерот Христијан Мицкоски: Коцевски тврди дека никаков договор за селективност не постоел и дека иницијативата за негово разрешување била неоснована – што, вели, го потврдил и Советот на јавни обвинители.
– „Функционален хаос“ во Вишото јавно обвинителство Скопје: дисциплински се гонат шефот и уште еден обвинител поради повлекување жалби и нарушени односи. „Не молчам за непрофесионалност, туку барам одговорност,“ порача Коцевски.
– Непостапување за дивоградби: оформени се предмети и по пријави и „допрен глас“ – меѓу нив и двата случаи што ги поднесе градоначалничката на Скопје. „Постапуваме каде и да е пријавено бесправно градење; злоупотребата на терминот ‘допрен глас’ не смее да биде параван за туѓо нечинење.“
Обвинителот најави дека писмено ќе ги испрати деталните одговори до Собранието и дека ќе продолжи, како што рече, „да гони засновано на закон, а не на партиски директиви“.
ИЗВОР: racin.mk
