Поранешниот претседател Стево Пендаровски, во интервју за албанската „Лајм ТВ“, оцени дека денешната политичка клима е „најнестабилна по 2001 година“, но јавноста ја возбуди неговата изјава за несреќниот 3 октомври 1995 година – денот кога експлозија насочена кон службено возило на Киро Глигоров го потресе Скопје.
„Колку повеќе ги разгледувам деталите, толку појасно гледам потпис на режимот на Слободан Милошевиќ,“ рече Пендаровски, потсетувајќи дека Белград токму тогаш бил притиснат од санкции и меѓународна изолација, а независна Македонија почнувала да добива западна поддршка.
Според него, „квалитетот на експлозивот, професионалната изведба и геополитичкиот контекст“ укажуваат дека нарачателот не можел да биде никој друг освен „службите на Милошевиќ“. Пендаровски тврди дека дел од службените досиеја и натаму се затворени, но „времето работи за вистината“ и дека меѓународниот притисок би можел конечно да донесе одговори.
Коментирајќи ја актуелната политичка сцена, екс‐претседателот предупреди дека „политиката на вечни непријатели“ ги блокира институциите и ја оддалечува земјата од европската агенда. „Она што ни го направија деведесеттите, сега си го правиме самите“, оцени Пендаровски и додаде дека „политичкиот дијалог мора да се врати пред изборниот циклус 2026“.
Одговор од српска страна засега нема. Во Белград, историскиот наратив останува дека официјалните власти немале учество во нападот врз Глигоров, а случајот и по три децении остана без судска разврска.
ИЗВОР: racin.mk
