Скопје, 8 јули — Пожарот што избувна во неделата покрај магистралниот пат Скопје – Блаце најверојатно бил подметнат, изјави денеска директорот на Дирекцијата за заштита и спасување (ДЗС), Стојанче Ангелов.
Според него, интервентните екипи на терен пронашле дрвени палети, за кои се сомневаат дека претходно биле натопени со бензин и оставени меѓу смреките за намерно да го поттикнат огнот. „Линијата на пожарот беше премногу широка за да се работи само за отпушок од цигара“, нагласи Ангелов во видео-обраќање.
Тој додаде дека утринава непознати лица се обиделе повторно да го реактивираат огнот на веќе локализираните жаришта, но противпожарните единици успеале навреме да интервенираат. Ангелов апелираше граѓаните веднаш да пријават на бројот 112 доколку забележат лица што носат или поставуваат палети или се однесуваат сомнително во шумски подрачја.
Директорот категорично ги демантираше информациите дека манастири или цркви биле загрозени од огнената стихија, како и тврдењата дека во Чучер-Сандево изгореле куќи.
Надлежните служби остануваат на терен за целосно да го расчистат подрачјето и да спречат повторна појава на пламен.
ИЗВОР: racin.mk
