Поради шумските пожари кои веќе два дена го зафаќаат подрачјето на Чучер Сандево, денес на вонредна седница на Општинскиот совет беше донесена одлука за прогласување вонредна состојба на територијата на општината.
Градоначалникот Сашко Комненовиќ изрази сериозна загриженост за моменталната состојба, истакнувајќи дека огнената стихија се шири на тешко пристапен терен помеѓу селата Блаце, Чучер Сандево и Кучевиште.
„Ситуацијата е сериозна, се менува со голема брзина и бара постојано ангажирање на сите достапни ресурси. Пожарот гори низ густа нискостеблеста и мешана шума, а гаснењето е значително отежнато поради силниот ветер“, изјави Комненовиќ.
Тој укажа и на недоволно брзата реакција на надлежните институции, предупредувајќи дека во вакви моменти секоја минута може да биде клучна.
„Не сакам да бидам критичен, но морам да прашам – каде се новите хермелини за кои Владата вчера се пофали дека се подготвени за интервенции при пожари? На терен беше забележано присуство само на едно вакво возило“, додаде градоначалникот.
Локалната власт апелира за побрза и поорганизирана интервенција, додека екипите на терен продолжуваат со напорите за справување со огнот.
ИЗВОР: racin.mk
