Во пресрет на вечерашната дебата во „Топ Тема“, на официјалниот Инстаграм-профил на ТВ Телма беше објавен исечок од изјавата на Андреј Жерновски, член на раководството на СДСМ, кој се однесува на спорниот извештај за Македонија во Европскиот парламент.
Жерновски ја оцени целата ситуација околу извештајот како „аматерска и непотребна“, алудирајќи дека проблемите не произлегуваат од содржината на документот, туку од начинот на кој бил комунициран во јавноста. Тој го посочи премиерот Христијан Мицкоски како директно одговорен за реакцијата на бугарските пратеници и последователната блокада.
„Документот првично беше сосема ОК и ќе поминеше, сè додека, како што кажаа бугарските пратеници, еден политичар не излезе со коментари во јавноста. Тој човек има име и презиме и функција – Христијан Мицкоски, премиер на нашата држава,“ вели Жерновски во исечокот.
Тој додаде дека, откако изјавите станаа јавни, се активирале не само бугарските пратеници туку и Европската народна партија (ЕПП), што довело до блокирање на усвојувањето на извештајот.
Жерновски го доведе под прашање и наративот за наводна заштита на идентитетот, истакнувајќи дека македонскиот идентитет е „веќе зацврстен и неприкосновен“.
Целосната дебата меѓу Андреј Жерновски и Миле Лефков од ВМРО-ДПМНЕ ќе се емитува вечерва во „Топ Тема“ на телевизија Телма.
ИЗВОР: racin.mk
