Иако американскиот претседател Доналд Трамп објави дека стапи на сила прекин на огнот меѓу Иран и Израел, што двете страни го потврдија, Тел Авив тврди дека Техеран истрелал две балистички ракети кои биле соборени со што било прекршено примирјето.
Министерот за одбрана на Израел Кац вели дека им наредил на израелските одбранбени сили да „одговорат енергично“. Техеран, пак, ги негира обвинувањата. Трамп соопшти дека и Израел и Иран го прекршиле прекинот на огнот што го објави неколку часа претходно и дека не е задоволен од ниту една страна, особено од Израел.
Доналд Трамп -претседател на САД
„Сите авиони ќе се свртат и ќе се вратат дома. Никој нема да биде повреден, прекинот на огнот е на сила“.
Според американски извори, клучна улога во ова одиграл емирот на Катар, Тамим бин Хамад ал-Тани, кој ги убедил Иранците да го прифатат прекинот на огнот. Најавата на Трамп за мир следеше по иранскиот ракетен напад врз американска база во Катар и серијата израелски воздушни напади.
Прифаќањето на договорот дојде откако Техеран го почна својот последен ракетен напад врз Израел, при што загинаа најмалку четири лица, а 22 беа ранети, додека Израел пред зори почна блиц воздушни напади насочени кон локации низ Иран. Израелскиот премиер Бенјамин Нетанјаху изјави дека неговата земја се согласила на прекин на огнот со Иран во координација со американскиот претседател Трамп.
Бенјамин Нетанјаху – премиер на Израел
„Израел ќе одговори силно на секое кршење на прекинот на огнот“.
Техеран соопшти дека ирански нуклеарен научник бил убиен во израелски напад пред да стапи на сила прекинот на огнот. Генералниот директор на Меѓународната агенција за атомска енергија, Рафаел Гроси, изјави дека испратил писмо до иранскиот министер за надворешни работи, Абас Аракчи, во кое предлага состанок и повикува на соработка по објавувањето на прекинот на огнот меѓу Иран и Израел.
Извор: 24vesti.mk
