Три лица загинаа во ноќните руски напади врз североисточниот дел на Украина

Во нападите со дронови врз североисточниот украински град Суми загинаа три лица, вклучувајќи и осумгодишно дете, објавија рано утринава регионалните власти.

-Околу полноќ Русите извршија масовен напад со беспилотни летала врз селото. (…) Имаме информации за три смртни случаи“, рече шефот на регионалната администрација, Олег Григоров.

Освен детето, загинаа и маж и жена, рече тој. „Убиените во нападот беа од различни семејства. Сите живееја на истата улица“, додаде Григоров.

Градоначалникот на Харков, Игор Терехов, во соопштение на Телеграм изјави дека Русија во текот на ноќта испалила седум беспилотни летала кон овој град на североистокот на Украина, додавајќи дека во нападите се повредени три лица.

Од друга страна, руското Министерство за одбрана соопшти дека во текот на ноќта руската воздушна одбрана соборила 20 украински беспилотни летала.

Во соопштението се наведува дека 14 беспилотни летала се соборени над Курскиот регион, а по едно над териториите на Белгородскиот, Брјанскиот, Орјолскиот и Смоленскиот регион, објавија руските меидуми.

Шефот на Московскиот регион, Андреј Воробјов, изјави дека беспилотно летало на украинските вооружени сили погодило станбена зграда во Красногорск, по што станот на 17-ти кат се запалил и дека две лица се повредени.

-Околу 100 луѓе, меѓу кои и 30 деца, беа евакуирани од зградата, рече тој.

Два други дрона беа соборени над западниот дел од руската престолнина, а никој не беше повреден, рече тој.

Непосредно пред полноќ во неделата, во руски воздушен напад беа убиени најмалку 10 цивили во Киев и околниот регион, вклучувајќи и едно 11-годишно девојче, наведоа украинските власти.

Нападите траеја повеќе од четири часа, прво беа употребени експлозивни дронови, а потоа балистички и крстосувачки ракети.

Во нападите во регионот Одеса во јужна Украина во понеделник, исто така, загинаа две лица, а беа повредени најмалку десетина други, пренесуваат локалните власти.

Украинските градови се цел на руски напади секоја вечер, додека преговорите за прекин на огнот меѓу Киев и Москва се во застој, и покрај притисокот од Вашингтон.

За време на вчерашната посета на украинскиот претседател Володимир Зеленски на Обединетото Кралство британскиот премиер Кир Стармер објави договор за производство на дронови што ја зајакнува воената соработка со Украина, особено во производството на напредни дронови.