Израел го нападна Иран Повеќе од 200 борбени авиони на воздухопловните сили ракетираа нуклеарни и воените постројки ширум државата. Погодени се десетици цели, вклучувајќи го главниот објект за збогатување ураниум, убиени првите луѓе на Иранската армија.
Од Тел Авив се заканија дека нападите ќе продолжат се додека не се елиминира можноста Техеран да развие нуклеарно оружје. Во очекување на реакцијата од иранската војска, израерлците масовно купуваат храна и вода, сите добиле инструкции да останат блиску до засолништата, службите за итни случаи складираат крв, а дел од болниците почнале да ги отпуштаат пациентите на домашна нега за да се ослободат капацитети.
Во меѓувреме, националниот совет за безбедност ги повика Израелците во странство да бидат претпазливи поради стравот од одмазда. На окупираниот Западен Брег, во сите палестински градови е прогласен полициски час.
„Ја погодивме високата команда, ги погодивме високо рангираните научници кои го унапредуваат развојот на нуклеарно оружје, ги погодивме нуклеарните инсталации. Но, знам, а и вие знаете, нема лесни војни.“ – Бенјамин Нетанјаху премиер на Израел.
Иран веднаш возврати на нападите и лансираше преку 100 дронови кон Израел, голем дел од нив пресретнати уште пред да влезат во израелскиот воздушен простор. Врховниот лидер на земјата, Ајатолахот Али Хамнеи, и се закани на израелската влада дека ќе биде сурово казнета за најновите напади, во кои елиминирани се неколку високи ирански нуклеарни научници и воени функционери, меѓу кои началникот на генералштабот на иранската армија и првиот човек на револуционерната гарда. Убиени се и цивили откако биле погодени станбени згради во престолнината.
„Утрово, ционистичкиот режим ја ослободи својата зла и крвава рака во злосторството против Иран и ја откри својата подла природа. Со овој напад, ционистичкиот режим си подготви горчлива судбина, која дефинитивно ќе ја добие.“ – ајатолах Али Хамнеи.
Во меѓувреме, државниот секретар на САД, Марко Рубио, тврди дека земјата на никаков начин не е поврзана со нападот на Израел врз цели во Иран и дека Израел презел еднострани дејствија. Нападот го намали и просторот за маневар на САД да обезбедат согласност од Иран за запирање на неговата нуклеарна програма. Трамп го предупредува техеран да се согласи на нуклеарен договор бидејќи во спротивно, ќе следат уште побрутални напади.
„Веќе имаше премногу смрт и уништување, но се уште има време да се стави крај бидејќи следните планирани напади ќе бидат уште побрутални. Иран мора да склучи договор, пред ништо да не остане, и да го спаси она што некогаш беше познато како Иранска империја. Да нема повеќе смрт, да нема повеќе уништување. Само направете го, пред да биде предоцна.“ – Доналд Трамп претседател на САД.
На страната на Техеран застанаа неговите соседи. Од Саудиска Арабија обвинуваат дека израелската агресија го поткопува суверенитетот и безбедноста на Иран. За либанската влада, најновите напади на Израел преставуваат кршење на меѓународното право и суверенитетот на Иран.
Голем број на земји почнаа да ги повикуваат своите граѓани да го напуштат регионот. Од македонското министерство за надворешни работи апелираат сите македонски државјани кои се наоѓаат на територијата на Израел и Иран да ги следат националните портали за итни случаи и строго да постапуваат согласно упатствата на надлежните институции. Исто така се порепорачува сите македонски државјани да се воздржат од какви било патувања кон земјите од овој регион.
„Согласно добиените информации од Амбасадата на Република Северна Македонија во Тел Авив, во моментов воздушниот простор над Израел и Иран е затворен, како и аеродромите во Тел Авив и Техеран, без конкретна најава за обновување на редовниот воздушен сообраќај.“ – Министерство за надворешни работи.
А додека траат борбите на блискиот исток, авиокомпаниите почнаа да ги откажуваат и летовите до и од Израел поради ескалацијата на тензиите меѓу двете држави. Летовите што веќе се насочени кон Израел беа пренасочени кон други аеродроми а сите закажани заминувања се откажани. Затворен за летови е и воздушниот простор над Ирак и Сирија.
Извор: 24vesti.mk
