АНКАРА (АА) – Aмериканскиот претседател Доналд Трамп повторно го актуализираше својот контроверзен предлог Канада да стане 51. американска сојузна држава, нудејќи ѝ бесплатно да биде дел од новиот ракетен одбранбен систем „Златна купола“, пренесува Анадолу.
„Му кажав на канадското раководство, кое многу сака да биде дел од нашиот фантастичен систем ‘Златна купола’, дека тоа ќе ги чини 61 милијарда долари доколку останат како посебна, нерамноправна држава, а ќе ги чини ‘нула’ долари доколку станат наша 51. сојузна држава“, објави Трамп на социјалната мрежа „Трут соушал“.
„Тие размислуваат за понудата!“, вели тој.
Од канадските власти сè уште нема официјален коментар, но премиерот на Канада, Марк Карни, на состанокот со Трамп во Белата куќа претходно овој месец, јасно истакна дека „Канада не е на продажба и никогаш нема да биде на продажба“.
Минатата недела, Трамп објави дека е избрана архитектурата за неговиот одамна најавен ракетен одбранбен систем „Златна купола“, чија реализација ја процени на 175 милијарди долари во наредните три години.
Иако деталите за програмата сè уште не се јавно објавени, Трамп изјави дека системот ќе користи „технологии од следната генерација на копно, море и во вселената, вклучувајќи и сензори и пресретнувачи поставени во орбитата“.
Не е прецизирано дали „Златната купола“ ќе го покрива целиот територијален простор на САД или само стратешки важните региони и населени центри, но Трамп тврди дека Канада покажала интерес за приклучување кон програмата.
„Канада сака да биде дел од тоа, што би значело релативно мало проширување, но ќе работиме на цените. Тие добро се информирани. Ни се обратија со барање да се приклучат. Мислам дека тоа е нешто одлично. Ако тие можат да си го дозволат тоа, ние можеме“, додаде Трамп.
Премиерот Карни потврди дека Канада води разговори со администрацијата на Трамп за приклучување кон одбранбениот систем, со цел да се зајакне безбедноста на Северна Америка од потенцијални закани.
Тој рече дека подобрената воена заштита е „добра идеја“, наведувајќи ги заканите од Северна Кореја, Русија, Кина, па дури и од „вселената во блиска иднина“.
Извор: Anadolu Agency (AA)
