Деблокада на евроинтеграциите – државниот врв ќе бара креативни решенија, како увертира во најавената можна средба на самитот на НАТО.
Шефицата на државата во интервју за Радио Слободна Европа, изјави дека се работи на тн креативна дипломатија – затоа што на владата, како што вели таа – и е јасно дека усвоена преговарчка рамка тешко се менува.
Објави нејзини предлози до ЕУ, во кои порача, дека Европарламентот може да донесе акт за состојбите меѓу Македонија и Бугарија, а Советот да даде одредени инструкции. Предложи и потпишување на уште еден протокол меѓу Скопје и Софија .
Гордана Сиљановска Давкова претседателка – Може, еве во некаков акциски план до историската бугарско – македонска комисија да се предочи тие може да бидат слободни но да внимаваат, иако вие велите дека е теорија. Не е теорија. Тоа се уставни акти на ЕУ, и тие треба да ги почитуваат не само во однос на членовите, туку и во однос на сите други. Значи да им се предочи. Два протоколи потпишавме, така? Еве може уште еден.
Сиљановска иако пред неколку дена објави дека Австрија е подготвена за медијација меѓу Скопје и Софија, денеска на директно прашање – дали претставници на Австрија ја контактирале Бугарија, немаше конкретен одоговор. Проача дека на иста линија со шефицата на австриската дипломатија бил и коментарот на претседателот на Европскиот Совет Кошта, кој предлогот за уставни измени со одложено дејство го оценил како добро решение но е отфрлен од Софија..
Гордана Сиљановска Давкова – Најчесто прашање до мене од надвор е дали ќе има уставни измени и мојот кус одговор е – не можам да гарантирам, бидејќи не сум апсолутен монарх. Значи по мене барањето од надвор уставни измени е спротивно на темелните вредности и принципи на Европската Унија вградени во договорот за ЕУ вградени во Лисабонскиот договор.
Пред два дена шефицата на европската дипломатија Каја Калас од Скопје порача дека има простор за решение за деблокада на евроинтеграциите, а Брисел се обидува да профункционира планот А. Заедно со премиерот не ги открија деталите за механизмите на кои работат, но најавија можна средба Сиљановска- Радев на маргините на НАТО Самитот во Хаг под будното око на челниците на ЕУ, Воената Алијанса и САД. И додека официјално Скопје чека одоговор, од Софија молк. Дали Хаг ќе стане место на нов почеток или уште една станица на меѓусоседски недоразбирања.
Извор: 24vesti.mk
