Од Дебарското муфтиство, кое ги опфаќа општините Дебар, Центар Жупа и општина Маврово и Ростуше, годинава во посета на светите места Мека и Медина, каде се реализира петтиот столб на исламот – аџилакот, ќе заминат 84 верници.
– За исполнување на петтиот столб од исламот, од нашето муфтиство ќе заминат 84 верници. Со нив во придружба се и тројца водичи за аџиите. Тргнувањето од Дебар, до скопскиот аеродром е на 29 мај од каде заедно со други верници ќе патуваат со чартер летови, рече за МИА, Орхан Зенго, секретар на Дебарското муфтиство.
Најголем број верници кои заминале на аџилак имало минатата година, или 100, претходната 30, а во 2022 година 12 верници.
Како што претходно денеска информираше за МИА, Ирсал Јакупи, генерален секретар на Исламската верска заедница, годинава на аџилак ќе заминат 2020 верници од нашата земја, што е идентична бројка како минатата година.
– Бројката е пополнета согласно квотата што ја одреди Министерството за хаџ на Саудиска Арабија. Верниците ќе патуваат од 24 мај, со 11 авионски чартер летови, со по 180 патници. Тие се од различни возрасти, највозрасниот е над 80 а најмладиот на 10-годишна возраст. Цената за аранжман за Хаџ 1445/2024 е 6.700 евра, што е повисока за 150 евра споредено со минатата година, додаде Јакупи.
Големиот празник Курбан Бајрам, годинава се паѓа на 6 јуни и секогаш се слави четири дена.
ИЗВОР: racin.mk
