АНКАРА (АА) – Израелската армија рано утринава уби палестински новинар додека беше на лекување во болница во Кан Јунис, јужниот дел на Појас Газа, јавува Анадолу.
Канцеларијата за медиуми на Владата со седиште во Газа соопшти дека жали за убиството на новинарот Хасан Еслаих и рече дека Израел го убил додека бил на лекување во болницата „Насер“ откако преживеал претходен обид за атентат.
Во соопштението се додава дека со атентатот на Еслаих бројот на палестински новинари убиени од Израел од почетокот на геноцидот во Газа во октомври 2023 година досега се искачи на 215.
Во соопштението остро се осудува израелското „системско целење кон новинари“, повикувајќи ги Меѓународната федерација на новинари, Арапскиот сојуз на новинари и сите прес-организации низ светот да ги осудат израелските злосторства и да ги гонат пред меѓународните судови.
Палестинското Министерство за здравство го осуди бомбардирањето на Израел на болницата „Насер“ во Кан Јунис и убиството на две лица што примале медицинска помош.
Доцна синоќа израелската армија ги продолжи нападите врз Појасот Газа, по привременото затишје за да може палестинската група Хамас да го ослободи израелско-американскиот војник Едaн Александeр, по договорот меѓу Хамас и американската администрација.
Во бруталните израелски напади од октомври 2023 година досега во Газа се убиени речиси 52.900 Палестинци, повеќето од нив жени и деца.
Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата поради својата војна во енклавата.
Извор: Anadolu Agency (AA)
