АНКАРА (АА) – Австралискиот премиер Ентони Албаниз и неговиот Кабинет денес положија заклетва за втор мандат откако неговата партија победи на неодамна одржаните избори, јавија локалните медиуми, пренесува Анадолу.
Албаниз положи заклетва како премиер пред генералниот гувернер Сем Мостин, објави Еј-би-си њуз.
Новата Влада ќе има 42 члена, составена од 23 члена на Кабинетот, седум дополнителни министри и 12 помошници министри, кои положија заклетва на функциите.
Вчера Албаниз објави дека Ричард Марлес ќе биде заменик-премиер и министер за одбрана, а Пени Вонг ќе продолжи да биде министерка за надворешни работи во втор мандат.
Лабуристичката партија досега освои 89 места од 150 во Долниот дом, 13 повеќе од потребните 76 места за формирање влада со просто мнозинство.
Сузан Леј е назначена за нова лидерка на опозициската Либерална партија откако доби 29 партиски гласови во споредба со 25 за Ангус Тејлор.
Според медиумот, таа е прва жена на оваа позиција во 80-годишната историја на партијата.
Поранешниот лидер на Либералната партија, Питер Датон, загуби на неодамнешните избори.
Извор: Anadolu Agency (AA)
