ИСТАНБУЛ (АА) – Американскиот претседател Доналд Трамп денес изјави дека претстојните мировни преговори меѓу Русија и Украина во Турција се „многу важни“, додавајќи дека смета оти „од таа средба може да произлезат добри работи“, јавува Анадолу.
„Средбата в четврток со Русија и Украина е многу важна“, рече Трамп на прес-конференција. „Јас бев многу настојчив состанокот да се одржи“.
Американскиот претседател изрази оптимизам во врска со потенцијалниот исход: „Мислам дека од тој состанок може да произлезат добри работи“.
Трамп ја истакна човечката цена од тековниот конфликт, опишувајќи ја војната како „целосно нова форма на војување“ и како „насилна и злобна“.
Тој повика на прекин на „ужасното крвопролевање“, нагласувајќи дека војниците „не се американски војници“, туку човечки суштества „кои се убиваат на нивоа какви што не сме виделе од Втората светска војна“.
Мировните преговори треба да се одржат во Истанбул, Турција, а украинскиот претседател Владимир Зеленски посочи дека го прифаќа предлогот на Москва за продолжување на преговорите.
Турскиот претседател Реџеп Таип Ердоган ја поздрави поддршката на неговиот руски колега Владимир Путин за рестартирање на процесот од местото каде што запре во Истанбул, потврдувајќи ја посветеноста на Турција кон мировните напори.
Извор: Anadolu Agency (AA)
