Туристичкиот водич Елена Трпчевска во емисијата „Јави се“ на ТВ21 истакна дека туристите ни се смеат за патот кој води кон убавиот кањон Матка.
„Имаме големи туристички тури кои секојдневно доаѓаат од Турција – по десет автобуси дневно доаѓаат да ја посетат Матка. Но, за жал, државата ја претставуваме многу лошо. Патот до Матка личи на швајцарско сирење – полн е со дупки. Нема јавни тоалети, нема доволно паркинг места – ниту за автобусите, ниту за автомобилите на туристите кои доаѓаат индивидуално“, вели Трпчевска.
Таа додава дека не постои никаква организација на просторот.
„Никаква мерка ниту да се организира целиот простор тука, каде што може да се наплаќа од туристите тука и да се има пари да се среди патот. Да има лица кои ќе го организираат движењето и паркирањето. Туристите гледаат и се смеат, вакво туристичко место со ваков пат… срамота“, додава Трпчевска.
ИЗВОР: ТВ 21
