Почна изградбата на новиот автопат Тетово-Гостивар, во должина од 18 километри. Изградбата ќе чини 90 милиони евра, а треба да заврши за две години.
За да го означат почетокот на градежните работи, на теренот излезе премиерот Христијан Мицкоски заедно со амбасадорката на САД, Ангела Агелер и дел од министрите.
Функционерите на ВРЕДИ дојдоа заедно, но без Таравари. Тој пристигна со неговите сопартијци од Алијансата за Албанците.
Во својот говор, премиерот Мицкоски истакна дека денес започнува еден од клучните инфраструктурни проекти во земјата и дека како земја без излез на море, имаме потенцијал да бидеме дел од три паневропски коридори.
Првиот вицепремиер, Изет Меџити, изјави дека ова не е само пат, туку европска артерија која го поврзува Јадранското со Црното Море.
„Денес наместо фотоапарати, одекнуваат звуците на камиони и багери. Ние не снимаме реклами, туку ја градиме иднината – патишта за народот. Коридорот 8 не е само пат, туку европска артерија што го поврзува Јадранското море со Црното Море, во срцето на Балканот. Нашата стратешка одлука е јасна – Македонија го гради својот дел и ја приближува Европа до Балкан и Балкан до Европа. Со почетокот на овој автопат, го претвораме Полошкиот регион во крстопат на можности и инвестиции, нови работни места, ја скратуваме врската меѓу Скопје, Охрид и Струга и ја приближуваме границата кај Ќафасан до секој наш дом и секоја бизнис-идеја“, вели Изет Меџити.
„Големо е задоволството што како американска амбасадорка сум денес тука со вас, бидејќи самото присуство овде значи напредок. Ова е долгоочекувана иницијатива за сите оние кои ја чекаа овој пројект со години. Многу сум задоволна што сум тука, особено да ја слушнам и видам работата на Џош и неговиот тим од Бехтел и Енка, Владата, бидејќи многу од овие работи се случија во последните месеци. Ова не е важно само за инфраструктурата и економијата на оваа земја и регионот, туку претставува и важен коридор за НАТО, затоа улогата на овие патишта не може да се потцени“, вели Анџела Агелер.
Проектот предвидува две коловозни ленти и една помошна лента во еден правец. Вклучува и девет надвозници, од кои осум ќе служат за поврзување на локалните патишта.
ИЗВОР: ТВ 21
