Во контекст на глобалното одбележување на Светскиот ден на слободата на медиумите, кој годинава е посветен на влијанието на вештачката интелигенција врз новинарството и медиумите, Агенцијата за аудио и аудиовизуелни медиумски услуги (АВМУ) изрази загриженост и потсети дека само професионалните и независни медиуми можат да придонесат за одржлив демократски развој во време на брзи технолошки промени.
Како што нагласуваат од АВМУ, „слободата на медиумите значи право на новинарите да истражуваат и информираат без какви било притисоци“. Но, со напредокот на вештачката интелигенција, ова право добива ново значење и се соочува со нови предизвици, кои бараат внимание и прилагодување.
Вештачката интелигенција нуди нови можности за унапредување на новинарските практики, како што се автоматизацијата на создавањето содржини, унапредување на истражувачкото новинарство и забрзана проверка на факти. Сепак, исто така носи и сериозни ризици, како што се генерација на дезинформации, лажни вести и манипулативни видеа кои можат да ги подријат темелите на јавниот дискурс.
„Вештачката интелигенција претставува ценет ресурс во новинарската пракса, но таа не смее да биде целосна замена за темелната проверка, критичкото размислување и објективноста“, велат од АВМУ. „Во оваа нова реалност, медиумите мораат внимателно и одговорно да ги користат овие алатки, придржувајќи се до највисоките етички и професионални стандарди.“
Со оглед на глобалните промени во медиумската индустрија, АВМУ потсетува дека е од суштинско значење медиумите да ги зачуваат принципите на слобода и одговорност и да се осигураат дека новите технологии се користат во корист на јавноста, а не за манипулација или дезинформации.
ИЗВОР: racin.mk
