Денеска во Кочани се одржа нов протестен марш, организиран од семејствата на загинатите во трагичниот пожар што се случи на 16 март во дискотеката „Пулс“. Маршот, под наслов „Задоцнета реакција“, се одржа како израз на револт против институционалното работење и неадекватната реакција на властите.
Со слики од своите најмили во рака, семејствата започнаа од Паркот на револуцијата, движејќи се преку трговскиот центар и продолжувајќи кон Општина Кочани. Тие ги изразија своите гнев и разочарување од недостатокот на навремени и ефективни дејства од страна на институциите.
Протестот продолжи кон Министерството за внатрешни работи (МВР), каде демонстрантите им посочија дека властите задоцниле со реакција на трагедијата.
– Сите вие кои сте одговорни за системот во државата, кои мудро ја избегнувате одговорноста за најголемата трагедија што се случи во Кочани, мора да знаете дека болката што ја чувствуваме ние, родителите на починатите деца, е нешто што е невозможно да се изрази со зборови. Се надеваме дека барем за миг ќе можете да ја почувствувате таа болка. Дали ќе прикривавте соучесници ако убиените деца беа ваши деца? – праша една од мајките.
Протестот заврши пред Основен суд, каде граѓаните побараа отчет за сработеното и поголема транспарентност во судскиот процес. За нив е клучно да се обезбеди неселективна правда за сите жртви и нивните семејства.
ИЗВОР: racin.mk
