ЕРУСАЛИМ / АНКАРА (АА) – Израелскиот министер за финансии од крајната десница, Безалел Смотрич, денес се закани дека ќе ја собори Владата на премиерот Бенјамин Нетанјаху доколку армијата не го окупира Појасот Газа и воено не завладее со него, пренесува Анадолу.
Во соопштението Смотрич истакнува дека израелскиот премиер „е на крајот одговорен“ за водењето на израелската војна во Газа.
„Започнете кампања за поразување на Хамас, окупација на Газа и спроведување на привремена воена влада додека не се најде друго решение, вратете ги заложниците и започнете со планот на Трамп – или оваа Влада нема право да постои“, рече тој.
Крајно десничарскиот министер го бранеше својот став за поддршка на забраната за влез на хуманитарна помош во Газа.
Според израелските медиуми, Смотрич се судрил со армискиот началник Ејал Замир поради одбивањето на Замир војската да биде одговорна за дистрибуцијата на помошта во Газа.
„Ако не сте способен, ќе донесеме некој што е способен, ако не знаете како да го направите тоа, ќе најдеме некој што знае“, му рекол Смотрич на Замил на состанокот на израелскиот безбедносен кабинет синоќа.
Од 2 март Израел ги затвори граничните премини на Газа, блокирајќи го влезот на основните продукти во енклавата и покрај повеќекратните извештаи за глад на територијата уништена од војната.
Израелската армија го продолжи нападот врз Газа на 18 март, прекршувајќи го договорот за прекин на огнот и размена на затвореници што беше на сила од 19 јануари.
Од октомври 2023 година досега Израел уби над 51.300 Палестинци во енклавата, од кои повеќето жени и деца.
Во ноември минатата година Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува со случај за геноцид пред Меѓународниот суд на правдата за неговите постапки во енклавата.
Извор: Anadolu Agency (AA)
