Според првичните информации, причина за вчерашната сообраќајна несреќа во која загинаа три лица, а осум се повредени, е неприлагодената брзина на патот, изјави министерот за внатрешни работи, Панче Тошковски, кој денеска го посети СВР Охрид.
„Во синоќешната несреќа, за жал, животот го загубија три лица. Според првичните податоци, едниот од учесниците во несреќата возел со огромна брзина, што, за жал, доведе до фатални последици“, истакна Тошковски.
Министерот додаде дека бројот на сообраќајни жртви во првото тримесечје од оваа година е приближно на исто ниво како и минатата година, но нагласи дека бројките се катастрофални во споредба со европските стандарди.
„Во иднина максимално мора да се фокусираме кон поголемо смирување на сообраќајот од секој аспект, како и на имплементирање на проектот ‘Безбеден град’ на цела територија на државата“, додаде Тошковски.
Како што соопшти министерот, минатата недела, на ЕНЕР беа ставени на разгледување дел од законите потребни за спроведување на проектот „Безбеден град“.
Несреќата се случи вчера на патот помеѓу Кичево и селото Трапчин дол, а според првичните информации од портпаролот на СВР Охрид, во инцидентот биле вклучени три возила.
ИЗВОР: racin.mk
