Во организација на Филолошкиот факултет „Блаже Конески” при Универзитет „Св. Кирил и Методиј” денеска и утре во Скопје се одржува Научна трибина „Книжевниот и интеркултурниот превод како динамика на премини на границите“.
Трибината, на која учествуваат научници, лингвисти и македонисти од Северна Македонија и Грција, е резултат на континуитет на соработката на Филолошкиот факултет при УКИМ и Катедрата за словенски, балкански и ориентални јазици од Универзитетот Македонија во Солун, која беше воспоставена на крајот од минатата година кога во Солун се одржа конференцијата „Перспективите на културната соработа: Македонскиот јазик“.
На почетокот на научната конференција денеска во Скопје се обратија деканот Филолошкиот факултет „Блаже Конески” при УКИМ Владимир Мартиновски и Јоанис Манос во име на Катедрата за словенски, балкански и ориентални јазици од Универзитетот Македонија во Солун, кој зборуваше на македонски јазик.
Панелите на конференцијата денеска се организирани според темите „Книжевниот превод од грчки на македонски и од македонски на грчки“, „Јазични и културни интерференции преку преводот“ и „Интеркултурните преводи како минување граници“.
ИЗВОР: racin.mk
