Мноштвото училишта низ Велика Британија ја забранија употребата на мобилни телефони за време на училишните часови, покажува првото национално истражување од овој вид, со оглед на растечката загриженост за негативното влијание на паметните телефони врз благосостојбата на младите, јавува Анадолу.
Истражувањето, нарачано од детскиот комесар на Велика Британија, Рејчел де Соуза, покажа дека 99,8 % од основните училишта и 90 % од средните училишта имаат имплементирано одредена форма на забрана за мобилни телефони.
Тоа ја нагласува одлучната промена меѓу челниците на училиштата за ограничување на пристапот на учениците до паметните телефони во образовните установи.
Даниел Кебеде, генералниот секретар на Националниот образовен синдикат (NEU), изрази силна поддршка за забрана со закон, велејќи дека тоа ќе го олесни товарот врз директорите на училиштата, наставниците и родителите.
„Мој личен став е дека би поддржал законска забрана за мобилните телефони во училиштата“, рече Кебеде. „Сметам дека тоа би го намалило притисокот…, но и за родителите“.
Кебеде предупреди на „штетното влијание“ на паметните телефони врз децата, особено кога се изложени на негативностите онлајн.
„Просечно 12-годишно дете има пристап до најтврдокорната порнографија на својот мобилен телефон“, рече тој. „Тоа е неверојатно штетно за благосостојбата на младите момчиња и нивните перцепции за жените и девојките, сексот и врските“.
НЕУ треба да разговара за предлозите на својата годишна конференција следната недела од која ќе повика на посилно регулирање на платформите на социјалните медиуми, особено во врска со штетните содржини како што се сексуалното насилство и заканите врз жените.
Кебеде, исто така, нагласи дека се залага за „целосна забрана за социјалните медиуми за деца под 16 години“, споредувајќи ги платформите како ТикТок, Снапчат и Инстаграм со тутунските компании во однос на нивното влијание врз менталното здравје на младите.
Извор: Anadolu Agency (AA)
