РИМ (АА) – Лидерот на италијанското опозициско движење „Пет ѕвезди“, Џузепе Конте, побара да се воведе целосно ембарго на оружје за Израел поради неговите напади врз Газа, јавува Анадолу.
„Повеќе од 100 мртви за 24 часа. Над 300 деца убиени за две недели“, напиша Конте на платформата X, нагласувајќи дека продолжуваат израелските напади врз здравствените установи и домовите на цивилите.
Тој рече дека Италија и Европа молчат пред „бруталноста“ што ја спроведува Владата на израелскиот премиер Бенјамин Нетанјаху.
Критикувајќи ја позицијата на Европскиот парламент, Конте изјави дека неговата реакција е сведена само на изразување загриженост што, според него, „нема никаква смисла“.
„Мора да се воведе целосно ембарго на оружје за Израел и да се наметнат строги економски и дипломатски санкции за владините функционери и нивните поддржувачи“, истакна 60-годишниот политичар, кој беше премиер на Италија од 2018 до 2021 година.
Во северниот италијански град Милано стотици граѓани излегоа на протест поради убиството на палестински новинари во Газа од страна на израелските сили.
Од почетокот на израелската офанзива во октомври 2023 година во Газа се убиени повеќе од 50.500 Палестинци, при што најголем број од жртвите се жени и деца.
Во ноември минатата година Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант со обвинение за воени злосторства и злосторства против човештвото во Газа.
Истовремено, Израел се соочува со судски процес пред Меѓународниот суд на правдата (МСП) за обвиненија за геноцид поради војната во палестинската енклава.
Извор: Anadolu Agency (AA)
