Кочанските планинари и активни доброволци-пожарникари Тошо и Стојка Антови, чија ќерка Ивона загина во пожарот со 59 жртви во дискотеката „Пулс“ во Кочани на 16 март, покренаа иницијатива за изградба на меморијален споменик на Пониква кај местото Аеродром, кој ќе биде посветен на загинатите.
„Во овој меморијален комплекс ќе има подигнато столб кој на секое скалило што ќе симболизира еден загинат живот и секоја година овој простор ќе се оплеменува со нови 60 садници во знак на сеќавање на сите загинати во пожарот во Кочани или како последица од оваа ужасна катастрофа“, вели Антов.
Стојка Антова, која е искусен планинарски водич вели: „Да бевме навремено известени за случувањето во дискотеката, ние знаевме како да постапиме таму, без паника еден по еден ќе ги извлечевме децата. Нашата единица беше подготвена за 5 минути по известувањето и за кратко време се најде кај дискотеката. Но за жал, беше доцна“.
Таа смета дека споменик на Пониква ќе симболизира чист воздух, а не чад и задушување од што загинаа повеќето од жртвите во дискотеката. Антови се надеваат дека нивните иницијативи ќе бидат прифатени и ќе ги добијат дозволите за изградба.
„Има некои иницијативи за некаков споменик на тоа место кај дискотеката, но за нас тоа воопшто не е одржливо. На тоа место повеќе не сакам да отидам, ниту да го видам, а камоли да оддадам некаква почит. Може само покрај меморијалниот споменик на Пониква да има паметник и во градскиот парк во Кочани“, вели Антова.
Од 59-те жртви во пожарот во кочанската дива дискотека 6 се деца, а од 197 повредени 25 се деца.
ИЗВОР: racin.mk
