Одличната прва сезона на Ханси Флик на клупата на Барселона продолжи и со синоќешниот триумф во Мадрид над Атлетико, со што каталонскиот тим стигна до финалето на Копа дел реј, каде ќе ги одмери силите со вечниот ривал Реал Мадрид.
Флик остана без пораз и на шестото гостување во Мадрид во тренерската кариера, а Германецот сега ќе се обиде да продолжи уште една фантастична серија, ако се знае дека тој во тренерската кариера нема загубено ниту едно финале. Тимовите на Флик досега играле шест меча за трофеј, притоа забележувајќи исто толку победи.
Германскиот стратег веќе ја водеше Барса во едно финале, она од Супер-купот на Шпанија што се играше во Саудиска Арабија, каде каталонците го демолираа Реал Мадрид со 5-2.
Финалната серија победи на чело на Баерн Минхен тој ја почна со триумфот над ПСЖ во Лигата на Шампионите со 1-0, по што во Супер-купот на Европа ја совлада и Севилја со 2-1. Флик стигна и до пехарот на светското клупско првенство откако Левандовски стрелаше прецизно за триумф на Баерн над Тигрес од 1-0, а се закити и со пехари во Купот на Германија (победа над Баер Леверкузен од 4-2) и во Супер-купот на својата татковина (3-2 над Борусија Дортмунд).
Дали серија ќе продолжи, ќе видиме на претстојното финале на Копа дел реј против Реал Мадрид…
Извор: kurir.mk
