Долгорочен план за трошоците за одбраната со вклучување на нови одбранбени технологии и трансформација на армијата, план во висина од 25 милијарди евра, најави грчкиот премиер Киријакос Мицотакис од Парламентот, истакнувајќи дека станува збор за „најдрастичната трансформација на вооружените сили во современата историја на државата“, јави дописничката на МИА од Атина.
Мицотакис рече дека кога станува збор за средства за националната одбрана, тие не се однесуваат само на трошоците и инвестициите во воената опрема, туку и на „цврстата инвестиција на нашата татковина да остане силна, стабилна, независна, во свет кој се менува со непредвидливо темпо“.
– Ако нема заштита од надворешни закани, не постои одржлив развој, инвестиции, туризам, иновации. За сè е потребна стабилна и безбедна средина. Кој би го вложил својот капитал во земја која не ги чува своите граници?, рече Мицотакис истакнувајќи дека „инвестициите во одбранбените капацитети се инвестиции во суверенитет, инвестиции кои се однесуваат на заштитата на националното достоинство“.
Објасни дека министерот за одбрана за периодот на програмата „располага со 25 милијарди евра, важен износ во која мора да даде приоритет и да ги смести оние опции кои се навистина критични и неопходни“,
– Основната филозофија (на новата програма) е пред сè поврзана со интеграција на новите одбранбени технологии и начинот на кој во суштина во пракса гледаме дека се менува начинот на операциите. Од Украина па сè до она што се случува на Блискиот Исток, сега се соочуваме со поинаква војна од онаа што ја знаевме или од онаа што нашите вооружени сили евентуално би биле подготвени да ја водат, рече Мицотакис и ги спомена како пример возилата без екипаж, методите на војување со беспилотни летала и против дрон заштитата, систематската употреба на вештачка интелигенција, сајбер одбраната и сајбер нападите итн.
На крајот од неговиот говор во Парламентот, грчкиот премиер посочи дека за оваа долгорочна програма потребно е да има национален консензус. (МИА)
Извор: kurir.mk
