ЛОНДОН (АА) – Европските државјани што патуваат во Велика Британија сега ќе мора да поседуваат онлајн дозвола за влез во земјата како дел од новите правила за патување воведени од британската Влада, јавува Анадолу.
Системот за Електронска патна авторизација (ETA), кој стапи на сила денес, има цел да ја зајакне безбедноста на границите и да го олесни процесот на влез во земјата.
Шефот на граничните сили на Велика Британија, Фил Даглас, го опиша системот како „мерка за гранична безбедност“ и изјави дека не се очекуваат значителни нарушувања по неговото воведување.
ETA важи за државјани на околу 30 европски земји, вклучително и сите членки на Европската Унија, со исклучок на Ирска.
– Како функционира ETA?
ETA е дигитално поврзана со пасошот на апликантот и дозволува престој до шест месеци.
Процесот на аплицирање е достапен преку мобилна апликација или веб-страницата на британската Влада, трае околу 10 минути и потребно е да се прикачат фотографија од пасошот и фотографија од лицето.
Обично одлуките се донесуваат во рок од неколку минути, но Министерството за внатрешни работи советува апликантите да аплицираат најмалку три работни дена однапред.
Оваа дозвола е задолжителна за сите патници, вклучително бебиња и деца. Исклучок има само за оние што транзитираат низ Велика Британија – мерка воведена откако аеродромот „Хитроу“ изрази загриженост дека може да изгуби патници.
ETA не е потребна за британски жители или лица што веќе имаат имиграциски статус во Велика Британија.
Британија ја воведе ETA минатата година за американски, канадски и други државјани на кои не им е потребна виза, а планот е постепено проширување на оваа шема за посетителите од целиот свет.
Извор: Anadolu Agency (AA)
