Во Србија денеска треба да почнат консултации за формирање нова влада при што покана е испратена до сите парламентарни партии, јави дописникот на МИА од Белград.
Најавата за денешен почеток на такви разговори ја даде српскиот претседател Александар Вучиќ во четвртокот – дека „од понеделник почнуваат консултации за кандидати за новата влада“. До пладнево, нема изјава ниту потег што ќе означи почеток на таков процес.
„В понеделник почнувам со консултации за составот на новата влада, ќе видиме што ќе кажат оние кои имаат мнозинство – дали сакаат да формираат влада или сакаат да одат на избори“, рече Вучиќ.
Опозицијата во Парламентот нагласува дека единствената опција што ќе ја прифатат е преодна влада со доверба на народот, додека најавените консултации ги оценуваат како исмејување на демократските процедури, објавија српски медиуми.
Засега само Социјалистичката партија на Србија јавно потврди дека коалицијата собрана околу таа партија ќе оди на консултации со Вучиќ. Портпаролот на СПС, Угљеша Марковиќ, рече дека претседателството на СПС едногласно донело одлука за продолжување на соработката со СНС и со Вучиќ.
Парламентарната опозиција пред речиси две недели изнесе предлог за „влада од доверба на народот“, и според нив – поканата за консултации не стигнала до одделни партии, туку само до лидерите на листите од декемвриските избори.
Претседателот на партијата Србија Центар (Срце) и пратеник Здравко Понош за Данас посочува дека намерата на Вучиќ да ја смени владата на Вучевиќ со нешто слично ја покажува неговата неодговорност и неподготвеност да овозможи земјата да излезе од длабока криза.
„Ребрендирањето во форма на нова влада на СНС/СПС или ново движење кое е ново пакување за старата коалиција е осудено на неуспех“, тврди соговорникот на Данас, додавајќи дека се што ќе објави и прави Вучиќ ја покажува неговата намера да оди кон радикализација и предизвикување конфликт.
Потпретседателот на Нова демократска партија на Србија, Дејан Шулкиќ, тврди дека делегација на српската коалиција НАДА нема да одговори на поканата за консултации. Слично мислење има и пратеникот и претседател на Движењето на слободни граѓани, Павле Грбовиќ, кој вели дека за неговата партија е неприфатлива покана во која нема дискусија за преодна влада.
Српското Собрание на 19 март ја констатираше оставката на премиерот Милош Вучевиќ поднесена на 28 јануари по напад врз студенти во блокада во Нови Сад. Со констатирање на оставка на премиерот, владата во Србија е во технички мандат, по што од тој датум почна и рокот од 30 дена за избор на нова влада.
Вучевиќ во денот на констатирање на неговата оставка од Парламентот, изјави дека е за опција за нова влада, а не за избори.
Toj во изјава за белградски медиуми тогаш рече дека „нема да има преодна, лажна влада“.
„Нема да има преодна влада…Како претседател на Српската напредна странка, велам дека нашите пратеници нема да гласаат за преодна влада“, изјави Вучевиќ.
Оставката на Вучевиќ беше поднесена три месеци по пад на бетонска настрешница на железничката станица во Нови Сад, негов роден град и каде беше претходно градоначалник, и во која имаше 16 жртви. Трагедијата е причина за масовни протести низ цела Србија што се уште траат.
По него оставка поднесе и градоначалникот на Нови Сад, Милан Ѓуриќ.
Извор: 24vesti.mk
