Нов земјотрес со јачина од 5,1 степени според рихтеровата скала утрово го погоди Мјанмар. Епицентарот на земјотресот, според податоците на европско-медитеранскиот сеизмолошки центар, се наоѓа на длабочина од приближно 35 километри под површината на земјата.
Бројот на загинати во земјотресот од 7,7 степени што го погоди Мјанмар во петокот надмина 1.000, додека повеќе од 2.376 лица се повредени. Уште 30 лица се водат како исчезнати, а спасувачките операции се во тек. Во земјата веќе почнаа да стигаат странски спасувачки тимови кои ја надлетуваат областа за да помогнат во потрагата по преживеани.
– Не знам каде ми се пријателите, моето момче не знам каде е и моето дете.
– Ќе бидам овде да помагам се додека сум потребн. Сите помагаат.
Земјотресот го погоди Мјанмар вчера околу 12:50 часот по локално време, а епицентарот се наоѓал на околу 16 километри од Мандалеј, вториот по големина град во земјата. Во Мандалеј, како што пренесуваат светските медиуми, спасувачите се обидуваат да стигнат до лица кои што се заробени под урната зграда. Во текот на ноќта екипите успеале да извлечат 50 лица од зградата. Мјанмар бара интернационална помош за да се справи со ситуацијата. Обединетите нации пак велат дека се загрижени што помошта не допира до оние на кои им е потребна во Мјанмар.
– Секоја земја и организација и секој во земјата е поканет да помогне во овие тешки времиња. – Мин Аунг Халинг.
Американскиот претседател Доналд Трамп потврди дека тие ќе пратат помош во Мјанмар. Америка се обидува да воспостави односи со војската на Мјанмар откако претходно ги санкционираа нејзините функционери.
– Разговарав со претставници на властите на Мјанмар по силниот земјотрес што ја потресе земјата. Ќе помогнеме. – Доналд Трамп претседател на САД.
Земјотресот од Мјанмар го погоди и Тајланд, над 50 луѓе се под урнатините, најмалку 10 луѓе загинаа, земјотресот уништи две згради и урна облакодер во изградба во главниот град Бангкок.
– Никогаш во милион години не би помислила дека вакво нешто може да се случи. Мојата внука е исчезната, не знам каде да ја барам, дали воопшто ќе ја најдам. Само седима сега и се молиме. – Бусари Маункпин-тетка на исчезнато девојче во Банког.
– Многу од моите колеги се таму под урнатините. И многу луѓе починаа. Сега чекам овде со нивните фамилии. Надевајки се дека ќе видам некој жив извлечен од под урнатините. – Тун Линг Анг.
Американскиот геолошки институт проценува дека бројот на загинати во Мјанмар би можел да надмине 10.000 а американскиот геолог Џес Феникс за Си Ен Ен изјавил дека „Силата ослободена од ваков земјотрес е еквивалентна на околу 334 атомски бомби“.
Извор: 24vesti.mk
