Американскиот потпретседател Џеј-Ди Венс за време на денешната посета на Гренланд ја нагласи потребата од американско лидерство на Арктикот, предупредувајќи дека ако не се преземе иницијатива, регионот ќе стане ранлив на ривалските сили, јавува Анадолу.
„Треба да обезбедиме Америка да води на Арктикот, бидејќи знаеме дека ако Америка не го стори тоа, други земји ќе ја пополнат празнината“, рече Венс во базата на Американските вселенски сили во Питуфик, на северозападниот брег на Гренланд, укажувајќи на експанзијата на руската и кинеската активност во регионот.
„Тие го прават она што веруваат дека е во нивен интерес. Соединетите Американски Држави мора да го направат она што знам дека е во наш интерес, а тоа е да се осигуриме дека Гренланд е безбеден.“
Неговите изјави доаѓаат во време на повторните напори на САД во периодот на претседателствување на Доналд Трамп за преземање на Гренланд, самоуправна територија на Данска. Иницијативата наиде на остри критики од данските и гренландските власти, кои континуирано ги отфрлаат американските амбиции.
Венс ги бранеше тие напори, тврдејќи дека присуството на САД во Гренланд е клучно за националната безбедност. „Која е алтернативата? Да се откаже од Северниот Атлантик, да го отстапи Арктикот на Кина, Русија и на други режими кои не ги имаат најдобрите интереси на американскиот народ во срцето?“, праша тој.
„Немаме друга опција“, нагласи американскиот потпретседател.
Венс рече дека иако нема непосредни планови за проширување на американското воено присуство, Вашингтон има за цел да ги зголеми инвестициите во безбедносната инфраструктура на Арктикот.
„Постојат општи цели што сакаме да ги постигнеме, а кои секако ќе бараат од нас да инвестираме повеќе ресурси“, рече тој. Исто така нагласи дека „претседателот јасно кажа дека не смета дека ќе биде потребна воена сила“.
– „Нашите сојузници не продолжија со одржувањето на безбедноста“ –
Венс, исто така, ги критикуваше европските сојузници, особено Данска, за неуспехот да ја одржат безбедноста на Гренланд. „Ова место, оваа база, околното подрачје, е помалку безбедно отколку пред 30-40 години, бидејќи некои од нашите сојузници не продолжија со одржување на безбедноста“, рече тој.
„Данска не направи добра работа во чувањето на безбедноста на Гренланд… Тоа мора да се промени.“
Осврнувајќи се на загриженоста во однос на политичкиот статус на Гренланд, Венс инсистираше на тоа дека САД го почитуваат правото на Гренланѓаните на самоопределување.
Американскиот потпретседател порача дека се надева дека жителите на Гренланд ќе изберат партнерство со САД и рече дека тоа ќе биде од бенефит и за безбедноста и за економијата.
Повтори дека САД ќе му понудат на Гренланд поголеми безбедносни и економски придобивки од Данска. „Мојот аргумент за нив е дека мислам дека ќе ви биде многу подобро ако дојдете под безбедносниот чадор на Соединетите Американски Држави отколку што сте под безбедносниот чадор на Данска“, рече тој.
Откако се врати на функцијата претседател во јануари, Трамп континуирано ја искажува својата намера за преземање на Гренланд „на овој или оној начин“, и покрај постојаното отфрлање од страна на Данска.
На автономната данска територија се наоѓаат стратешки воени инсталации на САД, но таа се спротивстави на американските предлози за територијално преземање од првата понуда на Трамп за купување на островот во 2019 година.
Посетата, првично планирана како посета од културен карактер, предводена од втората дама Уша Венс за набљудување на традиционалните трки со кучиња, е ревидирана да биде со фокус на безбедносните прашања по реакциите од официјални лица од Гренланд, Данска и Европската Унија.
Извор: Anadolu Agency (AA)
