Украинскиот претседател Владимир Зеленски денес ги повика сојузниците на самитот во Париз да испратат група претставници во Украина за заеднички да развијат јасен и обединет безбедносен план, јавува Анадолу.
Говорејќи на состанокот на високо ниво за одбраната на Украина, чиј домаќин беше Франција, Зеленски рече дека „коалицијата на волни и способни партнери“ веќе работи заедно политички и воено, нагласувајќи ја потребата да се одговори на „многу конкретни прашања“.
„Благодарен сум на Франција, Велика Британија и на сите вклучени за искрената желба да ни помогнат да изградиме долгорочна безбедност“, рече тој.
Зеленски истакна дека коалицијата сепак мора да ги разјасни конкретните детали за идното распоредување во Украина.
„Кои земји ќе бидат вклучени на терен, на небо и на море во Украина? Каде точно ќе бидат распоредени овие сили? Колкав ќе биде бројот и структурата на овие сили? Какви ќе бидат нивните процедури за одговор во случај на закана? И кога нашата коалиција всушност ќе ги распореди овие сили – на почетокот на прекинот на огнот или само по целосно завршување на војната и договор? праша тој.
Украинскиот претседател предложи да се покани мала група претставници од партнерските земји во Украина за заеднички да се изготви детален план.
„Потребен ни е еден јасен план – план за кој сите се согласуваме и почнуваме да го имплементираме, врз основа на опциите и предлозите кои веќе се дискутирани со вас и ви се достапни“, истакна Зеленски.
Извор: Anadolu Agency (AA)
