СОФИЈА (АА) – Повредените лица во пожарот што избувна во дискотека во Кочани, Северна Македонија, кои се на лекување во Бугарија се во тешка состојба, јавува Анадолу.
Во пожарот, кој избувна во дискотеката „Пулс“ во Кочани во 03:00 часот изутрина по локално време на 16 март, загинаа 59 лица, а 155 се повредени. Со воен авион и амбулантни возила четиринаесет од нив беа транспортирани на лекување во Бугарија.
Осуммина од повредените се хоспитализирани во Универзитетската болница „Н. И. Пирогов“ во главниот град Софија, а другите се лекуваат во Пловдив и Варна.
Директорот на болницата „Пирогов“, Валентин Димитров, изјави дека состојбата на осуммина пациенти на возраст од 15 до 31 година е критична и сите се наоѓаат на интензивна нега.
Димитров додаде дека и повредените што се лекуваат во Пловдив и Варна се во тешка состојба, а истакна и дека десетици граѓани во Софија учествувале во акцијата за дарување крв за повредените.
Бугарскиот премиер Росен Жељазков во изјавата за медиумите изрази сочувство до семејствата на младите што ги загубија животите во пожарот во Кочани.
Тој објави дека на 18 март е прогласен ден на жалост во земјата и нагласи дека Бугарија е со својот сосед во овие тешки моменти и подготвена е да обезбеди секаква помош.
Извор: Anadolu Agency (AA)
