Ние сме земја членка на НАТО и мораме да имаме проактивна надворешна политика со соодветна процена на регионот во кој живееме. Во суштина, цела Европа го поздрави последниот преддлог за примирје во Украина со посредство на САД – решение кое соодејствува со содржината на Резолуцијата зад која застанавме и ние. Како Влада, ќе продолжиме да бидеме активен чинител, ќе продолжиме јасно да ги афирмираме нашите позиции и ќе работиме со Европската Унија и САД, но пред да носиме каква било одлука, мораме да ги согледаме сите импликации врз нашите интереси. Ова го истакна министерот Тимчо Муцунски во денешното гостување во „Тема на денот“ на Сител ТВ.
Тој додаде дека ние не водиме натпревар со соседите, туку битка за афирмирање на нашите позиции, и потенцираше дека доколку претходните влади во изминатите седум години воделе ваква политика, немаше да бидеме во позицијата во која сме сега.
„Наша обврска е кон народот што не’ избрал и ни дал легитимитет – да го направиме неговиот живот подобар, да создадеме економска благосостојба и функционална држава“, беше дециден Муцунски.
Во однос на прашањето со соседна Бугарија, тој го повтори очекувањето за дијалог помеѓу двете страни, притоа децидно нагласувајќи дека дијалогот со сите чинители ќе се води во насока на заштита на националните интереси на државата.
Факт е дека устсвните измени не се единствената билатерална пречка која го попречува нашето зачленување во Унијата, и тоа е нешто што за нас како држава не е прифатливо. Доста е со национални и идентитетски отстапки за полноправно членство во Унијата. Ние активно ќе продолжиме да ја убедуваме Бугарија дека нејзин интерес е да одиме напред кон Унијата, но и со нашите партнери ќе работиме на изнаоѓање компромисно решение кое на нас како држава ќе ни даде предвидлив пат и извесност за нашата стратешка цел – членство во ЕУ“, истакна министерот Муцунски во гостувањето.
Тој говореше и за протестите во соседна Србија, притоа нагласувајќи дека Министерството за надворешни работи и надворешна трговија редовно ги следи случувањата во регионот и потенцијалните импликации за нашата држава. Изрази надеж дека протестите ќе завршат на мирен начин и дека не треба да бидат причина за загриженост кај македонските граѓани.
Во интервјуто тој ги коментираше и изјавите на одредени политичари од опозицијата кои шират лаги и дезинформации со единствена цел – да ги нарушат односите што државата ги има со своите стратешки партнери.
ИЗВОР: kurir.mk
