Во рамки на проектот „Јакнење на општинските капацитети за имплементација на проекти“, Општините Градско, Крушево, Македонски Брод, Новаци, Пехчево, Студеничани, Теарце, Чашка, Чаир, Охрид и Штип ќе добијат грантови од Фондот за техничка документација (ФТД) за изработка на техничка документација за подготовка на нови проекти.
Денеска градоначалниците на единаесетте општини ги потпишаа договорите кои значително ќе им помогнат во зајакнување на капацитетите на локалните самоуправи во насока на нивен поголем развој.
„Овој проект е од исклучително значење за помалите општини кои се соочуваат со ограничени човечки ресурси, недостаток на квалитетни проектни идеи и неподготвена документација. Несомнено, ова е инвестиција во развојот и иднината на општините, во подобрување на квалитетот на животот на граѓаните и во одржлив економски развој. Со оваа иницијатива правиме значаен чекор напред во создавањето на пофункционални, поконкурентни и поодржливи локални заедници. Продолжуваме посветено да работиме во насока на зајакнување на општинските капацитети, бидејќи силни општини значат силна држава“, истакна министерот за локална самоуправа, Златко Перински, во своето обраќање на потпишувањето на договорите, кои се резултат на петтиот повик на ФТД со кои се издвојуваат 350.000 американски долари за поддршка на 11 грантови, кои покриваат над 15 комплети техничка документација за општините.
Директорот за Бирото за регионален развој, Даут Мемиши, изрази искрена благодарност до сите партнери кои со својата посветеност и соработка придонесоа за успешното спроведување на овој процес и информираше дека општините веќе активно работат на собирање на потребните податоци.
Проектот „Јакнење на општинските капацитети за имплементација на проекти“ го имплементира Програмата за развој на Обединетите нации – УНДП со финансиска поддршка на Шведска и Бирото за регионален развој, а партнери во проектот се Министерството за локална самоуправа и ЗЕЛС.
Постојаниот претставник на Обединетите нации, Армен Григорјан најави дека до крајот на тековната втора фаза на проектот ќе се инвестираат околу 3 милиони американски долари во подготовка на над 130 комплети техничка документација. „Досега проектот има поддржано 90 вакви комплети. Задоволни сме што на основа на овие проекти општините реализирале финансирање на многу од нив преку различни национални и меѓународни механизми за финансирање“, изјави Григорјан.
Амбасадорката на Шведска, Н.Е. Ами Ларсон Џеин потенцираше дека Шведска, чија развојна поддршка повеќе од двојно се зголеми во последните три години, останува посветен поддржувач на македонските евроинтеграции. Таа ги истакна предизвиците кои им претстојат на општините, но и алатките развиени во рамки на овој проект кои им стојат на располагање за истите да ги надминат. „Секое 1 евро вложено во Фондот за техничка документација мобилизираше дополнителни 5 евра финансирање за изградба на конкретни инфраструктурни проекти во општините, во вкупен износ од 16 милиони евра за целосна изведба на 23 општински инфраструктурни и развојни проекти. Ова е само мал дел од неговиот целосен потенцијал, кој ќе може да се искористи само доколку има посветеност и сопствеништво од локалните и националните институции“, изјави амбасадорката Ларсон Џеин.
ИЗВОР: kurir.mk
