Според најновата анализа на осигурителната и проценителска компанија Hagerty, одредени класични автомобили значително ќе ја зголемат својата вредност во 2025 година. Оваа проценка не е случајна, туку резултат на детална анализа на квалитетот, дизајнот и побарувачката за секој модел.
Италијански легенди на врвот на листата
Најголемо изненадување е Alfa Romeo 147 GTA (2001-2005), спортски компактен модел со 3,2-литарски V6 мотор, кој веќе станува колекционерски класик. Неговата цена на пазарот веќе се искачи на околу 19.900 евра.
Тука е и Ferrari F355 (1994-1999), еден од најбараните Ferrari модели со препознатлив 3,5-литарски V8 мотор и звук кој многумина го споредуваат со „италијанска арија“. Неговата вредност варира меѓу 60.000 и 120.000 евра, во зависност од состојбата.
Трет претставник е Maserati Ghibli (1992-1998), модел со дизајн на Марчело Гандини и твин-турбо мотор од 325 коњски сили. И покрај повисоките трошоци за одржување, цените се движат од 11.000 до 65.000 евра.
Прифатливи класици и теренци со растечки потенцијал
За оние со поскромен буџет, Peugeot 106 (1991-2003), особено спортските верзии XSi и Rally, станува одлична инвестиција. Неговите цени моментално се 10.000 – 15.000 евра.
Најголемото изненадување е Toyota RAV4 (1994-2000), пионерот на компактните SUV модели. Верзиите со три врати се најбарани, а моментално чинат 700 – 6.000 евра, но аналитичарите очекуваат значителен раст на вредноста.
За љубителите на полуксузните теренци, Range Rover P38 (1994-2001) е сѐ побаран, иако некогаш имаше репутација на несигурен модел. Денес, неговата цена варира од 1.000 до 14.000 евра.
Два скапоцени камења за колекционерите
Листата ја заокружуваат Porsche 912 (1965-1969), кој нуди класично 911 искуство по пониска цена, и Subaru Impreza P1 (2000-2001), модел произведен во само 1.000 примероци, чија вредност сега се движи од 30.000 до 87.000 евра.
Ако поседувате еден од овие автомобили, можеби држите „златна кокошка“ – експертите препорачуваат да размислите двапати пред да го продадете.
ИЗВОР: racin.mk
