Евроамбасадорот Михалис Рокас очекува напредок на интегративниот пат. Тој вели дека на ниво на Европска Унија се работи напорно со Владата во земјава за надминување на секое преостанато прашање пред започнувањето на преговорите. Тој ова го истакна како одговор на неодамнешната идеја на известувачот Томас Вајц – Европската Комисија, Советот на ЕУ и бугарската Влада да дадат изјава дека промената на Уставот е последното барање.
„Има интензивни активности, дипломатски активности и размени. Лидерите на Европската Унија ќе го посетат Скопје во претстојните два-три месеца и се надевам дека ќе бидеме во можност да се придвижиме напред“, изјави шефот на мисијата на ЕУ, Михалис Рокас.
Од друга страна, премиерот Христијан Мицкоски нагласи дека високи претставници на ЕУ и претходно зборувале за последни билатерални барања.
„Седеа пред мене и ме гледаа во очи и ми велеа името е последната работа што треба да ја направите. Нормално, ние бевме и тогаш против, но и тогаш им велев дека не ја говорат вистината и дека не е последната работа“, изјави премиерот Христијан Мицкоски.
Сега, премиерот бара дела.
„А дела, по мене, претставуваат признавање на пресудите од Судот за човекови права во Стразбур за македонската заедница во Бугарија“, изјави премиерот Христијан Мицкоски.
Неофицијално, наредниов период земјава се очекува да ја посети и еврокомесарката за проширување Марта Кос, со која се очекува да се разговара за начините за деблокада на процесот.
ИЗВОР: ТВ 21
