„Во однос на генералните политики кои ги имаме ние како владејачко мнозинство, можам да ви кажам со сигурност дека се направени длабоки анализи, дека длабоко е промислен секој чекор којшто е преземен од аспект на нашиот пристап кон водењето на меѓународните односи, поучени од искуството од минатото, поучени од целосната слика којашто генерално се менува на глобален план“ , прецизираше во своето излагање пратеничката од редовите на владејачката ВМРО-ДПМНЕ, Иванка Василевска во гостување на Телма ТВ во емисијата „Топ Тема“.
Василевска објасни во кој правец се движи Македонија во новото геостратешко репозиционирање, според неа она што е клучно е дека многу од работите кои се случуваат актуелно во моментов биле најавувани. Таа истакна дека нашата политика се заснова во интерес на македонскиот национален интерес, со цел да донесе добробит за своите граѓани.
„Нашата политика ќе се заснова и се заснова, тоа беше пропишано и во изборната програма, се преточи во владината програма, во интересот внатрешен на Македонија. Од тој интерес извира и нашиот однос кон сите надвор, само на таков начин секоја една зрела политика може да верува дека може да донесе добробит и за своите граѓани, но и подобро да се претстави на меѓународно поле“ , посочи Василевска.
Василевска е децидна дека добиена е сериозна поткрепа од аспект на тоа што го поддржале стратешкиот партнер САД, додавајќи дека војната која трае на европско тло е недозволиво да се случува во 21 век. Таа додаде дека тогашниот министер за надворешни работи Бујар Османи имал погрешен пристап, односно се прифаќале услови без никаква консултација со релевантни чинители во Македонија, кој во политиката според неа е недозволив и не вродува со плод, во однос на нашите национални стратешки интереси.
„Во овој случај мислам дека ние добивме една навистина сериозна поткрепа од аспект на тоа што го поддржавме нашиот стратешки партнер, САД, во заложбата да спроведаат еден поинаков тип на дипломатија, кој се очекува да донесе повеќе плод. Три години имаме војна на европско тло, и тоа е нешто што и за ЕУ, но и за нас како цивилизација е недозволиво да се случи во 21 век. Имаме нерешени бирократизирани прашања коишто излегуваат од рамките на Копенхашките критериуми. Во минатото некој прифати многу работи коишто не требаше да ги прифати и исто така никој не беше консултиран и информиран“ , заклучува Василевска.
ИЗВОР: kurir.mk
