Братучедот на Асад, Махлуф, го нападна поранешниот генерал Дала за поттикнување инциденти во сириските крајбрежни делови

ИСТАНБУЛ (АА) – Сирискиот бизнисмен Рами Махлуф, братучед на соборениот лидер Башар ал-Асад, денес упати жестоки критики кон поранешниот бригаден генерал Гијат Дала, од Четвртата дивизија, обвинувајќи го за предизвикување на последните немири во крајбрежниот регион на Сирија и искористување на цивилите за своја корист, јавува Анадолу.

Во својата прва објава на социјалните мрежи по падот на режимот на Асад во декември минатата година, Маклуф остро ги критикуваше офицерите на Четвртата дивизија, особено Дала, велејќи дека тој стои зад судирите со безбедносните сили во последните денови.

„Што му направи на нашиот народ, Гијат Дала? Што направивте со шефот на военото разузнавање и цивилите околу вас? Зошто ги вклучивте овие невини цивили во оваа работа со вас и ја искористивте нивната потреба за пари?“, напиша тој.

Тој, исто така, го осуди неговиот братучед Асад, велејќи: „Зарем вие, господине претседателе бегалец, веќе не ја уништивте земјата, ја поделивте, ја уништивте нејзината војска и економија, го изгладнувавте нејзиниот народ и побегнавте со пари кои, доколку се поделеа, немаше никој да остане гладен или сиромашен?

Махлуф рече дека многу цивили ги загубиле животите во регионот за време на операциите на безбедносните сили и смета дека Дала е одговорен за поттикнување на случувањата.

Во последниве денови, во крајбрежните покраини Латакија и Тартус се случија координирани напади од поддржувачи на соборениот режим на Асад. Овие напади, окарактеризирани како најсериозни од падот на режимот во декември, беа насочени кон безбедносните патроли, контролните пунктови и болниците, што резултираше со жртви и повредени.

Како одговор, безбедносните и воените сили започнаа опсежни операции за пронаоѓање на напаѓачите, што доведе до жестоки судири.

Башар ал-Асад, лидерот на Сирија речиси 25 години, побегна во Русија на 8 декември, со што дојде крајот на режимот на партијата Баас, која беше на власт од 1963 година.

Ахмед ал-Шара, кој ги предводеше антирежимските сили во соборувањето на Асад, на 29 јануари беше прогласен за претседател за периодот на транзиција.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.