СДСМ го обвини ВМРО-ДПМНЕ за постојаните напори да ги избегне реалните проблеми на граѓаните, насочувајќи се кон евтини напади и измислени скандали.
Во соопштението опозициската партијата ја критикува ВМРО-ДПМНЕ за обидите да го дефокусира народот со апсурдни обвинувања, додека, цените во маркетите растат, платите стагнираат и стандардот на граѓаните се влошува.
„Додека цените во маркетите растат, платите стагнираат, а стандардот на граѓаните се руши, ВМРО-ДПМНЕ не само што не презема ништо, туку очајно се обидува да го дефокусира народот со апсурдни обвинувања за традиционалниот Осмомартовски марш, кој веќе години наназад е симбол на борбата за правата на жените“, се вели во соопштението.
СДСМ вели дека нападите на ВМРО-ДПМНЕ против маршот за женска еднаквост се доказ за нивниот системски однос кон правата на жените.
„Овој напад не е случаен. Тој е само уште една потврда дека ВМРО-ДПМНЕ не верува во еднаквоста на жените и дека целиот нивен партиски врв – не само министерката Кочоска – го дели истото назадно мислење”, стои во соопштението.
СДСМ ја потсетува јавноста на неодамнешниот инцидент со министерката Кочоска, која ја нападна пратеничката Славјанка Петровска.
„Ова не е само поединечен испад – ова е нивниот системски однос кон жените”, велат од СДСМ, нагласувајќи дека ВМРО-ДПМНЕ не само што нема политика за еднакви права, туку се противи на секоја иницијатива што ја зајакнува улогата на жените во општеството.
„ВМРО-ДПМНЕ треба да им одговори на граѓаните зошто цените во маркетите растат, а не да се бори против маршевите што ја слават женската еднаквост. Но, од нив никогаш не сме виделе ниту одговорност, ниту политика што е во интерес на народот – само манипулации и навреди кон сите што не се вклопуваат во нивната назадна матрица“, додаваат од СДСМ.
ИЗВОР: racin.mk
