АНТАРТИКА (AA) – Деликатниот екосистем на Антарктикот се соочува со ескалирачка закана од птичји грип и човечки загадувачи, што наметнува значителен ризик за неговиот див свет и животната средина, предупредуваат експертите, јавува Анадолу.
Турски научен тим спроведува значајно истражување за загадувањето предизвикано од човекот и птичјиот грип на Антарктикот со цел да ја заштити уникатната флора и фауна во регионот.
9-тата турска Национална научна експедиција на Антарктикот, организирана од Министерството за индустрија и технологија и координирана од Институтот за поларни истражувања ТУБИТАК МАМ, е посветена на решавање на еколошките прашања во регионот.
Тимот со години го мониторира отпадот што се фрла во морињата и разните предмети исфрлени на брегот.
И покрај тоа што е едно од најизолираните места на Земјата, Антарктикот е сè повеќе под влијание на човечките активности, особено на поморските операции и туризмот, кои придонесуваат за зголеменото загадување со пластика.
Ваквите човечки активности кои предизвикуваат загадување на животната средина претставуваат сериозна закана за морскиот живот и го нарушуваат деликатниот екосистем.
Тимот на научната експедиција, исто така, ги следи случаите на птичји грип користејќи брзи тестови за да се осигури здравјето на локалниот див свет. Воведени се строги безбедносни протоколи за заштита и на истражувачите и на екосистемот.
Откриен во 1960-тите години, од кога постојано еволуира, птичјиот грип периодично предизвикува смртоносни епидемии.
Последната епидемија започна на северната хемисфера кон крајот на 2020 година со сојот H5N1, што резултираше со смрт на огромен број птици.
Како што болеста се прошири на јужната хемисфера преку миграцијата на птиците, ризикот од нејзино пренесување на Антарктикот стана сѐ поголема грижа.
Додека напорите за контрола на птичјиот грип и регулирањето на човековата активност се во тек, обезбедувањето одржливо менаџирање со ресурсите на Антарктикот се покажува како витален предизвик за иднината.
Извор: Anadolu Agency (AA)
