Пуштањето на новата лабораторија за проверка на струјомерите во рамките на Бирото за метрологија е за да се даде избор на граѓаните ако се сомневаат дека нивното броило отстапува од предвидените параметри. Ова е ставот на Министерството за енергетика и на Бирото за метрологија од каде пак велат дека немаат информации дека има неточни броила во државава. Од Бирото посочуваат дека и во моментов има акредитирана лабораторија која ја врши оваа проверка.
Таа е на ЕВН, но е акредитирана од државниот Институт за акредитација, чии претставници еднаш годишно излегуваат на терен засилени со луѓе од Бирото и ја оценуваат оваа лабораторија дали ги исполнува законските критериуми. Од Бирото најавија дека нивната лабораторија ќе почне да работи наскоро и дека ќе важат истите правила како кога проверката ја врши и ЕВН.
„Видете, доколку мерачот излезе дека е во ред, тогаш плаќа тој што доставил барање, во случајов граѓаните, доколку излезе дека е неточен, тогаш плаќа ЕВН.“ , вели Седад Рушани.
Инаку, постапката за проверка дали струјомерот брои точно, е откако граѓанинот ќе достави пријава за проверка, екипа на ЕВН Дистрибуција со претставник од Бирото излегуваат на терен, го земаат броилото и го носат на проверка. И откако ќе проработи вторава лабораторија, постапката ќе биде иста, само со тоа што броилото ќе биде во Бирото и него ќе го проверат тамошните обучени вработени.
Од Метрологија велат дека секое броило кое се вградува од страна на ЕВН Дистрибуција е исправно бидејќи зад верификацијата стои производителот, што според ЕУ е доволно за гаранција, но кај нас во Македонија ова е засилено со дупла контрола.
„Првата верификација на мерачите ја прави произведувачот, на пример доколку ЕВН ја прави набавката, да не спомнувам сега компании, надвор од Македонија, нашите контролори одат таму и ја прават првата верификација, и доколку се во ред влегуваат на пазарот на Македонија.“, вели Седад Рушани.
Инаку, опремата во Бирото за метрологија е набавена пред седум години, но не е во потреба бидејќи се чекаше завршување на судскиот спор со добавувачот кој не ги исполнил предвидените услови од договорот.
ИЗВОР: ТВ 21
