Заменик-министерот за економија, Марјан Ристески, во емисијата „Бизнис21“ на ТВ21 зборуваше за мерките на Владата за стабилизирање на цените и економската состојба во државата. Тој истакна дека досегашните мерки, како ограничувањето на маржите и замрзнувањето на цените на одредени основни производи, веќе дале резултати и дека се очекува цените да се намалат во просек за 10%.
Во своето излагање, Ристески нагласи дека досегашните владини „кошници“, како училишната и есенската, значително им помогнале на граѓаните. Според него, училишната кошница овозможила заштеда од 1.500 до 2.000 денари по семејство, додека есенската, преку ограничување на бруто-профитната маржа, донела заштеда од 1.200 до 1.500 денари. Новогодишната кошница, пак, иако била иницирана од бизнис-секторот, имала помал ефект.
Во однос на острите реакции на трговците, кои се противат на новите мерки, заменик-министерот нагласи дека Владата донела одлука која мора да се спроведе. Според него, досега трговците ретко самостојно преземале акции за намалување на цените и не покажале доволна општествена одговорност. Тој истакна дека повеќе од 20 маркети доставиле предлози за намалување на цените, но сите биле различни, што покажува дека не постои усогласеност во нивниот пристап.
Ристески потенцираше дека Владата не ги прави истите грешки како претходната власт, која, според него, со неконтролирано замрзнување на цените предизвикала инфлација и штета врз бизнис-секторот. Како пример, тој спомена дека претходната влада наметнувала фиксни цени без консултации, што довело до економски проблеми кои сè уште се чувствуваат.
Тој исто така зборуваше за Законот за нефер трговски практики, кој е усогласен со европските директиви и е поддржан од сите политички партии. Овој закон, според него, нема веднаш да донесе резултати, но на долг рок ќе помогне во стабилизирање на пазарот. Иако досега нема изречени казни, инспекциските служби активно работат на терен, а казните за прекршување на законот може да достигнат и до 20.000 евра.
На прашањето за тоа како да се спречи манипулацијата со грамажата на производите, Ристески истакна дека постојат механизми во рамките на Државниот пазарен инспекторат (ДПИ) кои овозможуваат санкции за вакви злоупотреби. Владата, исто така, вовела правило според кое 70% од производите мора да бидат присутни на полиците, за да се спречи вештачко создавање на недостиг.
Ристески напомена дека граѓаните очекуваат драстично намалување на цените, но тоа не е реално, бидејќи пазарните услови не дозволуваат враќање на цените на нивото пред пандемијата. Според него, Владата ќе продолжи со политики кои ќе овозможат постепена стабилизација на пазарот.
Во однос на минималната плата, заменик-министерот истакна дека Владата нема да се меша во процесот, оставајќи го на работодавачите и синдикатите да ја договорат висината. Тој нагласи дека субвенционирањето на придонесите од страна на Владата е неодржливо, особено поради финансиската дупка оставена од претходната власт, која, според него, водела криминална економска политика.
На крај, Ристески најави дека Владата работи на нови законски решенија кои ќе обезбедат долгорочна стабилизација на цените и подобра заштита на потрошувачите. Овие мерки ќе бидат презентирани во јавноста наскоро, а нивната цел ќе биде да го задржат стандардот на граѓаните и да создадат попредвидлива економска средина.
ИЗВОР: ТВ 21
